TIYAK na ang mandato ni Mayor Sofronio ‘Nas’ Ona Jr. para sa ikatlong termino bilang alkalde ng City of Calaca sa Unang Distrito ng Batangas.
Ito ay kung ang pagbabatayan ng pagtaya ay ang resulta ng Calaca City Mayoral Preference Survey para sa 2025 Elections ng Pulse Asia Research, Inc.
Ayon sa magkahiwalay na survey noong Enero 2025 at Abril 2025, napanatili ni Mayor Ona ang napakalaking agwat nila ng katunggaling si Renante Macalindong.
Sa unang survey noong Enero 2025, ang mga respondents ay tinanong ng: “Kung ang eleksyon sa Mayo 2025 ay isasagawa ngayon, at ang mga kandidato ay sina 1. Reynante Macalindong at 2. Nas Ona, sino sa kanila ang inyong iboboto?”
Sa survey na ito, 87% ang bumoto kay Ona, samantalang 11% naman kay Macalindong, habang may natitira pang 2% na hindi sumagot.
Sa ikalawang survey naman noong Abril 2025, ang mga respondents ay tinanong ng: “Kung ang eleksyon sa Mayo 2025, sino ang inyong iboboto gamit ang sample ballot na ito (ipapakita ang sample ballot kung saan nakasulat ang pangalan ng pagpipilian.)
Sa pagkakataong ito, nakuha ni Mayor Nas ang kabuuang 84% samantalang, 12% naman si Macalindong.
Nitong nakalipas na linggo, inihayag ni Mayor Ona na gaya rin sa mga nakalipas na halalan ay abala umano ang kaniyang katunggali sa pagsasampa ng kung anu-anong kaso laban sa kaniya, ngunit binigyang-diin ni Mayor Nas na hindi siya magpapadala sa anumang uri ng paninira at panliligalig sa kaniyang kampanya.| – BALIKAS News
