LUNGSOD NG STO. TOMAS, Batangas — ANIM (6) na magulang ng mga child laborers sa lungsod ang nakatanggap ng kabuhayan package mula sa DOLE IVA-Batangas Provincial Office; sa ilalim ng Child Labor Prevention and Elimination Program (CLPEP) ng DOLE, katuwang ang Public Employment Service Office (PESO), Disyembre 29.
Matatandaan na noong nakaraang taon ay nag-ikot ang DOLE-PESO sa buong lungsod upang hanapin ang mga batang manggagawa o child laborers. Sila ay na-profile, minonitor at base sa kanilang pangangailangan ay hinandugan sila ng DOLE ng pagsisimulang kabuhayan na akma sa kanilang kakayahan.
Ibinahagi naman ni City Administrator Engr. Severino M. Medalla ang mensahe ni Pununglungsod Arth Jhun A. Marasigan na nagpapaabot ng pasasalamat sa ahensya ng DOLE para sa tulong na hatid sa ating mga kababayan at ang paghikayat sa mga magulang na pagyamanin ito para sa kinabukasan ng kanilang mga anak.
Ipinaliwanag din sa mga magulang ang mga lokal na programa ng pamahalaan kontra child labor gaya ng scholarship, educational assistance, summer job employment, livelihood at skills training na may layuning tulungan silang alisin sa kalagayang maagang pagta-trabaho, makabalik sa pag-aaral at tuluyang makapagtapos.|
