LIPA City — (UPDATED) KUMPIRMADO na ang pagkamatay ng dalawang bata matapos matagpuan ang katawan ng mga ito sa mga gumuhong kabahayan sa pananalasa ng bagyong Kristine nitong Huwebes, Oktubre 24, sa Sitio Tagbakin, Brgy. Halang, lungsod na ito.
Unang nakita, Biyernes ng umaga, ang katawan ng isang 9-buwang gulang na batang babae.
Bandang ala-1:10 naman ng hapon, nakita na rin ang katawan ng isang 9-taong gulang na batang lalaki na isa ring person with disability (PWD).
Labis ang paghihinagpis ng mga kaanak ng mga batang biktima dahil sa kalunos-lunos na sinapit ng mga ito.
Kasunod nito’y isasagawa na ang post-mortem examination sa labi ng mga biktima.
Samantala, ayon kay Lipa City Disaster and Risk Reducation Management Officer Leo Tejada, patuloy pa rin ang search and retrieval operation sa isa namang 25-anyos na babae na di pa matukoy kung saan ito naanod o natabunan ng magkalong putik at bato mula sa gumuhong bahagi sa naturang lugar.| – Ghadz Rodelas
