NANANATILING nasa ilalim ng General Community Quarantine (GCQ) ang mga lalawigan ng Batangas at Quezon taliwas sa mga kumakalat na bali-balita na isasailalim na rin ito sa Enhanced Community Quarantine (ECQ) sa Agosto 6.
Ayon kay Sec. Vince Dizon, deputy chief implementer ng National Task Force against Covid19, wala pang desisyon ang IATF kung ilalagay din ang Calabarzon Region sa mas mahigpit na quarantine status gaya ng NCR na isasailalim sa ECQ simula Aug 6 hanggang Aug 20.
Ginawa ang paglilinaw ni Dizon sa mga kumakalat na balitang magkakaroon umano ng re-classification ang quarantine status ng Region 4A base sa pag-uusap ng mga gobernador ng rehiyon at ni Health Sec. Francisco Duque III at ng DILG.
Sa kasalukuyan, ang Laguna ay na-reclassify na MECQ habang ang Cavite, Rizal at Lucena City ay GCQ with heightened restrictions at GCQ naman ang Batangas at Quezon.| – BNN, may ulat ni Bhaby de Castro
